كل اللي قبلك، كانوا سبب في ظُلم ناس كتير وهجرة ناس كتير وموت ناس كتير، وحبس ناس أكتر في دايرة الفقر والتعاسة والمرض والجهل.. ماعندكش أى مبررات للكدب علينا! ماعندكش أى مبررات لخداعنا أو خيانة ثقة الناس فيك! ماعندكش أى مبرر إنك تخلِّي حياتنا أسوأ! ماعندكش أى مبررات تقعد على كرسي وكلنا بندعي لك، وترجع تسيبه وإحنا بندعي عليك! إنت هاتبقى رأس الدولة دي، وكل السلطة التنفيذية تحت إيدك، هايبقى وراك شعب إختارك! ومجلس شعب بيساندك! إفتح لنا قلبك وإعمل كل اللي تقدر عليه.. مش مطلوب منك تبقى ساحر ولا إن مصر تبقى جنة.. مش مطلوب منك تحل كل المشاكل ولا إنك تخلِّي كل المصريين سعداء! مطلوب منك بس بكل الصدق والعزيمة تحاول.. حاول وإحنا وراك.. بس حاول
