خلص الكلام

خلص الكلام ..
و إزاي بقي راح تكتبي السطر الأخير ..؟
حواديت كتير ..
مين اللي قالك تبدئيها مره واحدة كلها ..؟
و بدون ما يجي المنتهي خلص الكلام ..
و متقبليش أبداً ملام ..
لأ .. و اللي زاد
إنك في غفله شهرزاد
حطيتي نفسك في الحكاوي و إبتديتي
تغزلي دور البطوله شرنقه
و مصدقه .. إنك حقيقي سندريلا
و الأمير مستنظرك
و مفكره .. صدق المشاعر يسحرك
و يجملك في عنيه
و أما الساعات دقت في نص الليل
حكم عليكي بالرحيل
مستنياه .. يسأل عليكي في البلاد
مليون معاد
ما تفكريها يا شهرزاد
دور البطوله مش عشانك للأسف
و إن عشتي طول العمر فيه
و إن كنت سبتك تكتبيه
إنسي خلاص .. طلع النهار
خطك صحيح .. واضح صريح
لكن أدائك مش هيعجب شهريار ..